کتاب قوشلار داها قورخمورلار نشر موغام

هئیکله بنزهییر. بارماقلاری آراسینداکی موشتوک باشیندا، سیگاری توستولهین بیر خانیم هئیکلی. دیبی دوشموش لؤتگهنین ایچینده أیلهشیب. دهنیزله گؤیو بیر- بیریندن آییران سرحددن ساحیله دوْغرو گلن لؤتگهیه باخیر. بیر آن هئیکلین قوْلو ترپهنیر. موشتویو آغزینا آپاریب، اونو اؤپن کیمی توستونو دهریندن سینهسینه چکیر. اؤسگورور. جانسیز هئیکلدن أت- قانلی بیر اینسانا دؤنور. کؤتویونهجن چکیلمیش سیگاری لؤتگهنین قیراغیندا أزیر. کؤتویو موشتویون باشیندان چیخاردیب، قومسالا آتیر. کؤتوک لؤتگهنین قیراغینداکی زیبیلتوْپلوسونون اوستونه دوشور. موشتویو خطکش کیمی ایکی بارماغینین آراسیندا دهنیزه ساری توتور. اوفوقدن گلن لؤتگهنین ائنی، موشتوک بوْیدادی. دیلاوجو میزیلدانیر:

«گؤرهسن گلن کیمدی؟»

دالبادال اؤسگورور. نفسی خیسیلداییر. کیفیندن بیر اسپرئی چیخاردیب، آغزینا فیسیلدادیر. باشینی قوْوزایاندا قومسالدا آیری بیر خانیم گؤرور. اوزو دهنیزه، آیاق اوسته دایانمیش بیر هئیکل کیمیدیر.

«بو کیمدی گؤرهسن؟ هاردان گلدی بَخود اولمادیم؟! شانسیم بویون لاپ بئله اوْمبا دوروب هاااا... کیمی گؤزلویوردوم، کیم قاباغیما چیخدی؟ گؤرهسن گؤیدن یئره دوشدو، یوخسا یئر آلتیندان گؤیردی؟!»