کتاب ایچیمده‌کی قیز نشر موغام

یئنه ایچیمده‌کی هیجانلی قیز باش قالدیریب. کولک قولاق‌لاریمدا کوشولداییر. اؤنومده‌کی هیبت‌لی آدامین آرخاسیجا گئدیرم. آغ-آپ‌آغ قار، اؤرپک کیمی داغ-داشی بورویور.

منه دئین یوخدور بوردا نه ایشین وار! تانیمادیغین کیشی ایله بیرلیکده داغ-داشا گلیبسن!.. ایچیمده‌کی قیز سسله‌نیر: «پیس دوشونمه؛ یولداش‌لاریمیزین هامیسی گونمه‌لیدی».

ایچیمده‌کی دوز دئییر. بو آدامی یاخشی تانیماسام دا، بیلمیرم نه‌دن‌دیر اونا گوونیرم. هئچ ده قورخمورام. اوندان اوشونمورم. راحتم. نه‌دن ناراحت اولوم‌ کی؟! نه اولسا بیزی یوخاریدان بیر‌-بیریمیزه تانیتدیریب‌لار.

داغدان یوخاری قالخاندا، یولون قیراغینداکی دامچانی منه گؤستردی: «اورا، بهلول عمی‌نین ائویدی». منیم گؤزوم قاش-قاباقلی بولودلاردایدی. «ائله‌بیل یاغاجاق» - دئدیم. بولودلارا باخیب اوزومه گولدو. «ایکی ساعت چکمز، تئز قاییداریق» - دئدی.

بیر آندا سرت سیماسی پوزولدو. شیرین-شیرین گولوشو ایچیمده‌کی قیزین اوره‌یین تاپپیلداتدی.

بیلمه‌دیم نئجه یوخاری قالخدیق. باشیم سؤز-صحبته قاریشمیشدی؛ صحبته یوخ، ائشیتمه‌یه. ائله دانیشیردی، سانکی بیر حزبین باشقانی ایدی. من آنجاق قولاق آسیردیم. هردن استرس‌لی مکتب اوشاق‌لاری کیمی سؤال‌لارین جوابلایاندا، ایچیمده‌کی قیز آز قالیردی اوندان سوروشسون «آخی بو سؤزلرین ائولنمه‌یه نه دخلی وار؟»

هر نه اولسا مندن یوخاری رتبه‌ده ایدی. سوروشسایدیم منه گولردی. اؤز یانیندا دوشونردی، بلکه بیر شئ آنلامیرام. یقین دخلی واردیر کی، منی معلّم کیمی سورغو-سؤالا چکیردی. یوخسا اللی دفعه دئمزدی «ائولنمه‌یه گؤره فکریمیزی بللی ائتمه‌لییک!» بلکه ده دوز دئییردی؛ یاخشی بیر ائولیلیک سورمه‌یه، مارکسیسم-کاپیتالیسمی داها یاخشی بیلمه‌لییدیک!