کتاب دلی کور نشر اختر

«گؤی‌تپه» کندی‌نین یاستی قازما داخمالاری «کور»ون ساحیلینه قدر سپه‌لنمیشدی. بو ایل یاغینلیق اولدوغوندان، او اوتلار واختیندان اول گؤیرمیش، یازین ایلیق نفسینی دویاندان سونرا ایسه پوسکوروب قالخمیشدی. هله آپرئل سونا چاتمامیش بو چال-چپرسیز کندین حیطلری، خیرمان یئرلری، تؤوله و سامانلیقلارین اوستو، حتی ائولرین داملاری دا یاشیللاشمیشدی. حیطلری بیرلشدیریب تورپاق یولا چیخان، سونرا دا ساحیلده‌کی چمنلیی چالین-چارپاز دوغراییب «کور»ه ائنن جیغیرلاری اوت باسمیش، کندین اوست طرفینده‌کی لپه‌لرین رنگی دیَیشمیشدی. ایل قوراقلیق کئچنده باهار گلمه‌میش سارالیب-سولان دمیه‌لر بو ایل گول-چیچه‌یه قرق اولموشدو. یالنیز کندین یاخی‌نیندان اؤتوب تیفلیسه دوغرو اوزانان خیر یولو اوّلکی کیمی آغاریر، بعضی یئرلرده داشلارین آراسیندان اوت جوجرسه ده طبیعتین بو عومومی آهنگینه تابع اولماق ایستمیر، دره‌لی-تپه‌لی یاماجلاری آشیب اوفوقده گؤزدن ایتیردی. هر شئی اوّلکی کیمی ایدی. حیط-باجالاردا اوجاق توستوله‌نیر، ماللار هایلانیب «کور»ه تؤکولور، قیز-گلینلر سویا ائنیردیلر. هاچاقویروق قارانقوشلار سوزوب سینه‌لرینی چیچکلره توخوندورور، «کور»ه باش ووروب سو گؤتورور، سونرا دا جیویلدشه-جیویلدشه بالالاری‌نین یانینا قاییدیردیلار. تورپاقدان گوجله سئچیلن قارا داملارین آراسیندا تکم-سئیرک گؤزه دَیَن داش ائولرین کیرَمیتلی دامینداکی سیغیرچینلار یئنه اوّلکی کیمی دیمدیکلرینی شاققیلدادیب اوخویوردولار. زرنیگار خانیم بونلارین هئچ بیرینی گؤرموردو. او، باشینی گؤی محَجَّرلی ایوانین دیره‌یینه سؤیکه‌ییب ایچین-ایچین آغلاییردی. تئز-تئز کلاغاییسی‌نین اوجو ایله گؤزونون یاشینی سیلیر، «من بو درده نئجه دؤزوم، کیمدن ایمداد ایسته‌ییم؟» -دئیه اینیلده‌ییردی. هاوادا سوزون ایری بیر چالاغانین کؤلگه‌سی چپرین اوستوندن آشیب، حیطین اورتاسی ایله تؤوله‌یه دوغرو سوروندو. زنجیرده‌کی ایتلر دارتینیب میریلداشدیلار. تویوق-جوجه قورخودان سامانلیغا دولوشدو. زرنیگار خانیم بونلارین هئچ بیرینه فیکیر وئرمه‌دی، کلاغاییسینی دوزلدیب ایواندان ائندی، جیغیرلا ساحیله دوغرو آددیملادی. گون خیلی قالخمیشدی. آخشامدان کندین اوستونه چؤکن دومان چکیلمیش، سحره یاخین یاغیش دا چیله‌میشدی. تورپاق یوللارین و جیغیرلارین توزو خال-خال اولموشدو. چمنلیین شئهی پاریلداییردی. «کور»ون لپه‌دؤیه‌نیندن بیر آز آرالی، چایلاقدا قاینار آسمیشدیلار. تومانچاق اوشاقلار یارغانین دیبی ایله قاچیشیردیلار. جامیشلاری هایلاییب سویا تؤکن جاوانلارین های-کویو سیلدیریم یارغانلاردا عکس ائدیر، بو یارغانلارین اوووقلارینداکی قوشلار هورکوشوب بؤلوک-بؤلوک هاوایا قالخیردیلار. لاکین زرنیگار خانیم هئچ نَیه فیکیر وئرمیردی. بوتون گئجه‌نی یاتماییب سحره‌جن آغلادیغیندان آروادین گؤزلری شیشمیش، کیرپیکلری بیر-بیرینه یاپیشمیش، گؤز یاشی قورویوب، موشمبه کیمی یاناغیندا قالمیشدی. قولاقلاری گویولده‌ییردی. او، هارا گئتدیینی بیلمیردی. اؤز ائویندن باش گؤتوروب اوزاقلاشماق، بیر آنلیغا دا اولسا، دردینی اونوتماق ایسته‌ییردی. آنجاق باجارمیردی. دیل دئسه ده اورک راضی اولمور، آیاقلاری سؤزونه باخماییب، سورونوردو.... -از متن کتاب-