کربلا سلطانی سن سن یا حسین
قلبیمون جانانی سن سن یا حسین
دوشموشم بیر درده یوخدور چارهسی
دردیمون درمانی سن سن یا حسین
رکن ایمانسان ایا شاه کرم
اهل دین ایمانی سن سن یا حسین
عاشق نام حسیندی ماسوا
ماسوانین جانی سن سن یا حسین
شوقیله معبودیله روز الست
باغلیان پیمانی سن سن یا حسین
آلموسان جانه هامی درد و غمی
عالمین جانانی سن سن یا حسین
راه عشقین ای شه والاتبار
اوّل و پایانی سن سن یا حسین
جانوه عاشقلرین جانی فدا
دین حق قربانی سن سن یا حسین
آتش غم یاندیروبدی قلبیوی
غم اوتی سوزانی سن سن یا حسین
گچموسن دینون یولوندا هر ندن
عشق حق ده فانی سن سن یا حسین
حق یولوندا جانه عشقیله آلان
اول سولی پیکانی سن سن یا حسین
اصغری ظلمیله عطشان اوخلانان
گزدیرن میدانی سن سن یا حسین
قتلگهده قانینه غلطان اولان
آغلادان دنیانی سن سن یا حسین
خیمهگاهی ظلم الیله اودلانان
آغلاشان نسوانی سن سن یا حسین
نیزه باشینده تلاوت ایلین
آیۀ قرآنی سن سن یا حسین
قان ایچینده بلکه مأیوس ایتمین
خصم بیوجدانی سن سن یا حسین
قیزلارین آغلار گوروب شمره اسیر
چخمین افغانی سن سن یا حسین
گوندرن بی کس عیالین کوفیه
زینبین گریانی سن سن یا حسین
خولیه مهمان اولان یاره باشی
آغلادان زهرانی سن سن یا حسین
ایلین «صدّیقه» تای بیکسلره
لطفیله احسانی سن سن یا حسین