کتاب صوتی قوشلار داها قورخمورلار اثر رقیه کبیری‮‬‬

کتاب قوشلار داها قورخمورلار اثری است که در سال ۱۳۹۵ منتشر شده و فضای آن در تبریز و میان طبقه متوسط شهری می‌گذرد. داستان حول محور شخصیت‌هایی شکل می‌گیرد که با گذشته و حال خود درگیرند و در جست‌وجوی معنای زندگی، عشق، مهاجرت و هویت هستند. رقیه کبیری با تمرکز بر روابط انسانی، به‌ویژه روابط زن و مرد و چالش‌های زنان در جامعه، تصویری از دغدغه‌های نسل‌های مختلف ارائه می‌دهد.

بخشی از کتاب

هئیکله بنزه‌ییر. بارماقلاری آراسینداکی موشتوک باشیندا، سیگاری توستوله‌ین بیر خانیم هئیکلی. دیبی دوشموش لؤتگه‌نین ایچینده أیله‌شیب. ده‌نیزله گؤیو بیر- بیریندن آییران سرحددن ساحیله دوْغرو گلن لؤتگه‌یه باخیر. بیر آن هئیکلین قوْلو ترپه‌نیر. موشتویو آغزینا آپاریب، اونو اؤپن کیمی توستونو ده‌ریندن سینه‌سینه چکیر. اؤسگورور. جانسیز هئیکلدن أت- قانلی بیر اینسانا دؤنور. کؤتویونه‌جن چکیلمیش سیگاری لؤتگه‌نین قیراغیندا أزیر. کؤتویو موشتویون باشیندان چیخاردیب، قومسالا آتیر. کؤتوک لؤتگه‌نین قیراغینداکی زیبیل‌توْپلوسونون اوستونه دوشور. موشتویو خط‌کش کیمی ایکی بارماغینین آراسیندا ده‌نیزه ساری توتور. اوفوقدن گلن لؤتگه‌‌نین ائنی، موشتوک بوْیدادی. دیل‌اوجو میزیلدانیر:

«گؤره‌سن گلن کیمدی؟»

دالبادال اؤسگورور. نفسی خیسیلداییر. کیفیندن بیر اسپرئی چیخاردیب، آغزینا فیسیلدادیر. باشینی قوْوزایاندا قومسالدا آیری بیر خانیم گؤرور. اوزو ده‌نیزه، آیاق اوسته دایانمیش بیر هئیکل کیمی‌دیر.

«بو کیمدی گؤره‌سن؟ هاردان گلدی بَخود اولمادیم؟! شانسیم بویون لاپ بئله اوْمبا دوروب هاااا... کیمی گؤزلویوردوم، کیم قاباغیما چیخدی؟ گؤره‌سن گؤیدن یئره دوشدو، یوخسا یئر آلتیندان گؤیردی؟!»

یوکسک سس‌ایله فیکیرلشمک، نیلفرین عادتیدیر. هر هانسی بیر ایش گؤرمه‌یه قصدی اولسا، ایشی گؤرمکدن اؤنجه سؤزو دیلینه سوزَر، سسه چئوریلر. نیلفر اؤز سسینی ائشیتمکدن خوشلانار.

«باخ أینی- باشینداکی رنگ‌لره..! نه ده گؤزل همنوالیخ یارادیب تؤکمه بدنینده. قهوه‌ای شالوار، یاشیل مانتو، قیرمیزی‌گوللو چَرقد... ائله بیل ایکی هاچالی چیچک هئیکلیدیر قومسالدا گؤیه‌ریب!»

ایکی ‌هاچالی چیچک دیم- دیک قارامتیل بیر چمدانین قیراغیندا دایانمیشدی. نیلفر اونون شسلی- بسلی قامتینه، دوروشوغونا باخدیقجا جوانلیغینی اؤزله‌ییر.