کتاب دیوان شهریار(ترکی) به انضمام حیدر بابا اثر محمدحسین شهریار نشر انتشارات نگاه

اوتوز آلتی ایل بوندان اول، ۱۳۳۲- نجی ایلین اسفند آییندا، نوروز قاباغی آذربایجان خلقی ئوز شاعریندن اونودولماز بیرهدیه آلدی. بو، استاد شهریارین «حیدر بابایا سلام» اثری ایدی. حجمجه کیچیک، مضمونجا دولغون اولان بو اثرین نشری ایچون او وقتکی تبریزین بوتون فرهنگی و پولیقرافیگ گوجوندن و امکانلاریندان استفاده اولونموشدی- خطینی میرزا طاهر خوشنویس یاز میشدی، شکللرین رسام مرتضی نخجوانی چکمیشدی، گراورلرینی میرزا عبدالوهاب شعاری حاضرلامیشدی، حسین آقا زفیرینین چاپخاناسیندا چاپ اولونموشدی، حسن تقویمی چاپین بوتون وسایلینی حاضرلامیشدی، مهدی روشن ضمیر، عبدالعلی کارنگ هربیری آیریلیقدا مقدمه یازمیش، شهریارین ئوزوده خلاصه شکلده اثرین یارانماسی حقینده ایضاحات وئریب اونو آذربایجانلیلارا تقدیم ائتمیشدی. شهریا بو گوزل منظومه‌نی یازماقدان هله چوخ- چوخ اول ئوزونون زنگین یارادیجیلیغی ایله ایراندا شهرت قازانمیش، حقلی اولاراق معاصر دورین حافظی لقبی کیمی عالی بیر مقام صاحبی اولموشدی. بوندان سونرا شاعر بیر سیرا عامللرین تأثیری آلتیندا و هامیدان اول آنا سنین آرزو وایستگی ایله «حیدر بابا سلام» منظومه سینی قلمه آلمیشدی. «حیدر بابا سلام» شمس قیس رازی‌نین افاده‌سیله دئسه‌ک «خوش طالع ایله دوغولموشدی». اثرین نشری ایله دیللر ازبری اولماسی، عموم خلق محبتی قازانماسی، سر حد لری آشیب تورک دیللی خلقلر آراسیندا یاییلماسی، یوزلرله نظیر لرله قارشیلانماسی، ماهینلار قوشولماسی، عاشیقلارین سازیندا، مغنی لرین آوازیندا اوخونماسی بیر اولدی. بو ادبی حادثه دن ایللر ئوتوب کچندن سونرا شهریار آنا دیلینده اونلارلاینی اثر یازدی، فقط باخیب گوردو که، هیچ بیریسی «حیدر بابا سلام» بویونا گلیب چاتمادی. چوخ احتمال که، شاعر آشاغیداکی مصر اعلاری یازماقلا بو حقیقتی اعتراف ائتمه‌لی اولدی: باخ که (حیدر بابا) افسانه تک الموش بیرقاف من کیچیک بیر داغی سرمنزل عنقا ائله دیم.