فیدیبو نماینده قانونی نشر موغام و بیش از ۶۰۰ ناشر دیگر برای عرضه کتاب الکترونیک و صوتی است .
کتاب دونيا قابار چاليب یولداش

کتاب دونيا قابار چاليب یولداش

نسخه الکترونیک کتاب دونيا قابار چاليب یولداش به همراه هزاران کتاب دیگر از طریق فیدیبو به صورت کاملا قانونی در دسترس است.


فقط قابل استفاده در اپلیکیشن‌های iOS | Android | Windows فیدیبو

درباره کتاب دونيا قابار چاليب یولداش

یئنه قیژیلتی کیمی بیر سسله اوره‌ییمدن آخدی. قولاق-‌لاریملا دئییل، سسینی ایچیمدن ائشیتدیم، اوره‌ییمدن. اوره‌‌ییمین سسینی قولاق‌لاریمدان علاوه بوتون ارگان‌لاریم ائشیدر. دؤشومون اورتاسیندا اوشاقلیغیمدان قالمیش اویونجاق بیر میمون طبیل چالار؛ هردنسه طبیل هاواسینا آتیلیب-‌‌دوشر، آز قالار اوره‌ییمی یئریندن قوپارسین. ال‌لریمده نارین بیر اسمه‌جه، آیاق‌لاریمدا یونگول بیر تیتره‌ییش، دَریم گاهدان پؤرتر، گاهدان بوزاریب، بوزا دؤنر. آددیمیمی میللی بانکین ایچینه آتماقدا، یومشاق‌-‌‌یومشاق اوزانیب اوره‌ییمدن عاغلیما دا قوندو. بئینمه باتدی. یئنه ده اوره‌کله عاغیل هؤووشنه‌سی... بئله احوالاتا دوشنده، زمان ذهنیمده ترسه ایشلر. اؤنومه آتدیغیم هر آددیمدا، هؤووشنه بیر آز داها درینه ایشله‌دی. هم اوره‌ییمده، هم‌ده بئینیمده. میللی بانکین آغ‌-‌‌‌‌قارا، شطرنجی کاشی دؤشه‌مه‌سی دقتیمی چکدی. اؤزومدن حیرتلندیم.‌۱۰‌‌‌ایل تامام، هر آی قیسط وئرمه‌یه گلرم. نییه ایندییه‌دک بَرخود اولمامیشام، بیلمیرم. بلکه ده‌۱۰‌‌‌ایل سوره‌سینده یالنیز باخمیشام. ایندیسه بیرینجی دفعه‌دی دؤشه‌مه‌نی گؤرورم. نؤبه نومره‌می چکیرم. ۶۶۶‌‌.

ادامه...
  • ناشر نشر موغام
  • تاریخ نشر
  • زبان فارسی
  • حجم فایل 0.99 مگابایت
  • تعداد صفحات ۱۶۸ صفحه
  • شابک

بخشی از کتاب دونيا قابار چاليب یولداش

شما به آخر نمونه کتاب رسیده‌اید، برای خواندن نسخه کامل، کتاب الکترونیک را خریداری نمایید و سپس با نصب اپلیکیشن فیدیبو آن را مطالعه کنید:



دونیا قابار چالیب، یولداش!

بو حکایه نین شخصیت لری حقیقی
شخصیت لرله اوخشارلیغی تام تصادفی دیر.

اونون اوتاغینا گیرنده، دیلکش اوخویوردو: «من طفل طوفان شده ام، موجم سرگردان شده ام...»
آنجاق منه « بویورون ! » دئمه دن دیلکشین سسینی قیسدی.
- «قویون قالسین، من دیلکشین موجون چوخ سئوه رم »- دئدیم.
ماهنی نین سسینی اوجالتمادان اونجه، گرامافوندا فیرلانان ۳۳ دور دیسکین اوستوندن ایینه دسته یینی گوتوروب، دیسکین بیرینجی دایره سینین اوستونه قویدو. دیلکش باشدان باشلادی: « من... موج در به درم... از... دنیا بی خبرم... بحر خروشان منزل من... سیلی طوفان حاصل من... »
گوستردییی صندلده اوتوروب - اوتورمامیش، یئتیک خانیم لار کیمی اونون اوتاغینی یوخلاماغا باشلادیم. آیریلارینین ائوینه گئدنده، بور - بوجاغا باش اوزالتماغا حوصله م چاتماز . حال بوکی ژورنالیست قیلیغینا گیرنده، چئوره یه دقتلی باخمالیسان. اونون اوتاغی آیریلارینین اوتاغینا بنزه مز. آپاراجاغیم دانیشیقدا اونون اوتاغینین نه وضعیتده اولماسی، یقین کی، مصاحبه نین بیر نئچه سطرینی دولدوراجاغینی دوشونموشم. اوسته لیک ۴۵ ایلدیر اونون آدی، ایستر - ایسته مز اولکه نین اَنتئللوکتوآل(۴) تاریخینه قاریشیبدی.
بیردن اوز کتابیندا یازدیغی سوزلر عاغلیمدان کئچیر. اونون ضیالی، یازیچی و معلم یولداشی سلیمان، آرازدا بوغولان گوندن بَری،آدی اسطوره آدلارینین سیراسیندا یئر توتوب، نریمان سا تهمت لر آلتیندا بیر تراژیک یاشام سوروب. او گوندن سلیمانین آدی اونون یاشامینی، آدینی بئله کولگه له ییب. بیر چوخ انسان بو نسلین یاشام ماجرالارین اوخویوب ائتگیلنسه ده، آنجاق هر انسانین فردیّتی، بیر ژورنالیست اولاراق، منیم دقتیمی چکیر. سلیمانین اولومو و آدی ائله کوک سالیب کی، نریماندان سونراکی یئددی آرخاسینی بئله کولگه له یه جک.
آتا - بابالاریمیز دئمیشکن، داغ داغایئتیشمه سه ده، انسان انسانا یئتیشرمیش؛ یوخومدا دا بئله تصور ائتمزدیم بیر گون نریمانی یاخیندان گورم. ایندیسه امکداشلیق ائتدیییم ژور نالین مصاحبه بولومونه مطلب حاضیرلاماق اوچون اونون برلین شهرینده یاشادیغی ائودن باش چیخارتمیشام. ژورنالین دفتریندن چیخا - چیخدا، باش رداکتور بیرداها وورغولادی:
- « گوروم آسلان دونه جک سن یوخسا تولکو ؟ »
- « ژورنالیست لر تولکو سویونداندیلار یوخسا آسلان؟»
باش رداکتورون دوداغی بئله قاچمادی. آدامین ذوقوندان وورماق اونون کیچیک ایش لریندن ایدی. تولکو خاصیت لری بیر یانا، آسلان کیمی ژورنالیست لرینین هاواسینی ساخلایان بیر باش رداکتور ایدی.
- « هر نه اولور اولسون ، دئمه دیک لرینی دیلینین آلتیندان چک !.. رستوران ماجراسی دا یادیندان چیخماسین ! »
اوز یانیمدا تولکو کیمی نریمانی سوال لاریم لا غافلگیر ائتدیییمی دوشونوردوم. بیر ایکی آددیم باش رداکتورون اوتاغیندان اوزاقلاشمامیشدیم کی، بیر داها اونون بم سسینی آرخادان ائشیتدیم:
- «یادیندان چیخماسین، حتماً سوروش گور ساری نین آخیری نئجه اولدو؟»
باش رداکتور اوزو قاداغان ائله دییی آدی دیلینه گتیر دییینده، هم سئویندیم، هم ده تعجب ائله دیم. « ساری » باش رداکتورون جانی کیمی ایدی. آغزیمی دولدوردوم دئییم:
- « مه یر ساری ایکی ایل قاباق ماشین آلتدا قالمادی؟» بیردن نریمانین کتابیندا اوخودوغوم «ساری» آدلی ایت یادیما دوشدو. ایت لرله علاقه باغلاماق باش رداکتورون اوزل خاصیت لریندن ایدی. ایکی ایل قاباق شوخلوغو توتوب، ساری یا ایچگی ایچیرتمیشدی. ساری ایسه عاغلی قاریشیب، نه زمان خیابانا قاچمیش، قارانلیقدا اوزونو بیر ماشینا چیرپاراق، ایچ - آلاتی ائشییه توکولموشدو. ساری اولندن بری باش رداکتور بیر ایل بویوندا افسرده لیک ناخوشلوغونا مبتلا اولدو. اوز یانیندا آند ایچمیشدی کی، داها دیلینه ایچگی دَیمه سین. او گوندن بری، یازیلمامیش بیر یاسایا گوره ساری دان دانیشماغا ژورنالین دفترینده قاداغا قویولموشدو. نه یاخشی کی، بارا قویمادیم. یوخسا یئنه اونو دئپرسیونا سوردوره بیلردیم.
قاپینین چرچیوه سینه دایانمیش، دانیشان، انسان صفتینده آلاش ایدی دئیه سن. بو گونه جن آلاش لا باش رداکتورون بو قدر بیر- بیرینه بنزه دیک لری هئچ عاغلیما گلمه میشدی. ایکی آی بوندان اوّل قورد سویوندان اولان آلاشی ۱۰۰۰ یورویا آلمیشدی. اونو آلان گوندن بری سوز- صحبتی آلاش دان باشلانیر، آلاش دا باشا چاتیر. آز قالیر یئمکده ده بیزه آلاش- چورک یئدیرتسین!
نوت دفتریمی چیخاریب، دوواری دفتره دایاق ائله دیم. نوبتی سوال لاریمین آخیرینا آرتیردیم:
دقت ! دقت! ساری یاددان چیخماسین. اوزللیکله باش- رداکتورا گوره .
آلاش ایتینه بنزه ین قاپینین چرچیوه سینه دایانمیش باش رداکتورون عصبی حالیندان واز کئچه بیلمزدیم. عادت اوزوندن یازیمین آلتیندا باش رداکتورون قاپی آغزیندا دورموش رسمینی جیزماقارالادیم.



آلاشین شکلینی چکمه میش گئده بیلمزدیم. تر- تله سیک آلاشین شکلینی جیزماقارالایاندا، یئنه ده باش رداکتورون سسی گلدی:
- « ژورنالیست! ساعاتیوا بیر باخ ! یوباندین هاااا. ال چک بو جیزماقارالاما خسته لیییندن ! »
باش رداکتور حیرصلننده، حوصله سی تنگ اولاندا، آدیمیزین یئرینه « ژورنالیست » دئیه خطاب ائدر بیزلری. اوزوم ده بیلیرم، بو جیزماقارالاما منده درمانسیز بیر پیسیک(۵) خسته لییینه دونوشوب. استرسلی حالدا بیری دیرناغین چئینر، بیری توکون قوپاردار، بیریسینین کیپرییی آتار، منسه جیزما-قارالاییرام. هارا اولدوغو اونملی دئییل، گاه دفتری دیزیم اوسته قویوب رسم چکرم، گاه دووار اوستونه، گاهدانسا اوتوبوسون شوشه سی دفتریمه دایاق اولار.
الیمده باشی آشاغی توتدوغوم قلمیمین جوهری یازانا-جان، ال چکه بیلمه دیم آلاشین شکلینی رسم ائتمکدن. بونونلا بئله، یئنه ده آلاشین جیزماقارالاماسی یاریمچیق قالدی، یوخسا آلاشا کت - شلوار گئیدیره جکدیم، اوزوده آسقیلی شالوار...



نریمان میزین باشیندا یاناکی اَیله شیب، باندلارا باغلانمیش سیم لری قوردالاییر. یاشلانسا دا، گووده سی ماهر ایدمانچی لار کیمی گوجلو و یئرلی یئرینده گورونور. تاقچا کیمی چییین- لری هئچ ده اَییلمه ییب. سونوندا منه دوغرو دونور. باخیشی قورشون کیمی آغیردی. چییین لریم اوزو- اوزونه آشاغی دوشور. اونو آرازدا چیمرکن تصور ائدیرم. آراز چایین یاخیندان گورموشم. تلاطم لی، لیللی بیر چای. آرازین اوزو بیر یانا، او تایی بیر زمان لار وعده وئریلمیش جنت کیمی ایدی. آمما وعده لر بوشا چیخدی، نریمانین باخیشینین ایزی بوشا چیخان کیمی. دونوب باخاندا سلیمان سودا ال- آیاق چالیر. سویا باتیر. سلیمان غفیلدن گوزدن ایتنده، نریمانین گوزلری تپه سینه چیخیب. گوز نئجه تپه یه چیخار؟ گوز آلتی اونا باخیرام. خیالمیدا گوزلرینی توکو توکولموش تپه سینه قالدیریرام. قورخمالی دئمیرم، آمما تپه سینده بیر جوت گوزو اولان انسان لا مصاحبه آپارماق چتین ایشدیر. آدامین عاغلینی قاریشدیرار. بیلمز دانیشانین آغزینا باخسین، یوخسا تپه دن باخان گوزلره. گوزلری تپه سینه چیخمیش نریمانی جیزماقارالاماغیم گلیر. بونونلا بئله نوت دفتریمی چانتامدان چیخارماغا ال ساخلاییرام.
بلکه ده ائوینه آیاق قویوب، حیاتینا باش اوزالتدیغیمدان خوشلانمیر. گلیب قارشیمدا ایله شیر. تبسّمله اوزومه باخدیقدا، ائله بیل باخیشینین آغیرلیغی چییین لریمدن گوتورولور. اونا گوره نه لر تصور ائتدیییمی بیلسه، یقین قولومدان یاپیشیب، ائویندن ائشییه سالار منی. فیکریم دَییشیر. اونون گوزلری تپه سینده اولسا بئله، تبسم ائدنده، اوزوندن مهربانلیق یاغیر. اوزومو اله آلیب بئلیمی دیکلد یرم. هله کی گوزلری تپه سینده دئییل، گوز چاناغیندا، یئرلی یئرینده دیر. اوزل فیکیرلریمی، اَنایین خیال لاریمی اوزومه ساخلا مالییام. ساختا، ژورنالیستی بیر تبسّم قوندورورام دوداغیما. ژورنالیست دونونا گیریرم. نوت دفتریمی، مدادیمی، وویس رکوردریمی چانتامدان چیخارا - چیخارا، یئنه ده گوزوم اوتاغینین بور- بوجاغینی سوزمکده دیر. ۴۵ ایل بویوندا چکدییی آغری - آجی لارین، استرس لرین ایزینی آختاریرام. او ایسه الینی باشینا، توک لرینه چکیر. ائوینه گلمه میش نه سوروشاجاغیمی، نه لره دقّت ائده جه ییمی، بیر به بیر نوت دفتریمده یازمیشام. اوتاقدا بیلگی سایار میزیندن باشقا بیر میز یوخدور داها. صندلیمی بیلگی سایار میزینه یاخینلادیرام. رکوردرین چالیشما دویمه- سینی باسیب میز اوسته قویا - قویا، بیلگی سایارین بویرونه دوزولموش کتاب لارین آدینی گوزاوجو اوخویورام: حافظ، شبیسترلی معجز، ما نیز در این خانه حقی داریم، گذر از خیال و...
نوت دفتریمی دیزیم اوسته آچیب، مصاحبه نی باشلاماق اوچون یازدیغیم سوزلره گوز گزدیریرم.
« دقّت ! دقّت!
نریمانین ائوینین دیب - بوجاغین گوزدن کئچیرمک یاددان چیخماسین. نشانه لر ... عکس لر ... یازی لار...»
نریمانا باخدیقجا یقینه چاتیرام کی اولکه مین تاریخینین بیر بولومو اونو کولگه له ییب. نریمان سا بو کولگه دن قاچا بیلیمر.
« تبریزه داریخیبسیز؟»
یازمادیغیم بیر سوال دی. قفیلدن عاغلیما گلیب، دیلیمده اوتورور. سوروشاندا اوزوم اوندان بتر ائویمیزی، کوچه- میزی، قونشولاریمیزی، « بی بی سی خجه » نی بئله اوزله ییرم. هفته یئددی اوسکگیزگون قونشولارین ائوینه وار - گل ائدیب، ائولرده اوز وئرن اوچ اوونه نین اولای لارینی سینه-سینه ییغیب، قاپی - قاپی پایلاشاردی. اونا گوره آدینی « بی بی سی » قویموشدوق .
«سامان میدانینا هر یئردن چوخ داریخمیشام.»
سامان میدانینی گورمه میشم. اونون کتابیندان تانیییرام اورانی. ایسته میرم کتابدان اوخودوق لاریمی بیر داها اونون دیلیندن ائشیدم. هئچ کیمه دانیشمادیغی سوزلری اونون دیلی آلتیندان چکمه لییم.
«بیلیرسیز هفته یئددی، او سکگیز، نه آنلامی وار؟»
«یانی ژورنالیست لر یئددی گونون سکگیزینی خبر ییغماقدادیلار!» - دئییب، گولور. «منیم ده ژورنالیست لرین فندیندن آز - چوخ باشیم چیخیر. یاشیمدان چوخ من نن مصاحبه آپاریبلار. آمما هئش بیری بیر کلمه ده اوزومنن سوروشمویوبلار ها.»
دانیشیغی صمیمی دیر. فیل بورنوندان دوشن لردن دئییل. صمیمیتی منده کی بوزلاری اریدیر. گئت - گئده راحت دانیشیرام.
«ایندی کی بیلیرسیز هفته یئددی، او سکگیز یانی نمنه، منه بی بی سی خجّه ده دئیه بیلرسیز؟»
«بی بی سی خجّه ! دئیه سن سن ده سامان میدانینین ادبیا تیندان باشین چیخیر هاااا.» گولور. « مارکس، انگلس، کیم.. کیم... هامیسی قیراخدا قالسین. من زیندگانلیغیمین بویوک درس لرینی سامان میدانیدان آلمیشام.»
بی بی سی خجّه نین یئرینی توتموش اولسام دا، اونون سیماسیندا وطن اوزلمینی سئچه بیلیرم. کوچمک انسانین ایچینده عومور بویو بیر حسرت اویالدار. نیسگیل بوردادیر کی، وطن تورپاغینا بیرده آیاق قویا بیلمه یه سن. باش رداکتورون همیشه کی اویود - نصیحتینی، طرف سیز مصاحبه ائتمه یی اونوتماغیم گلیر. اونا دئمیرم، آمما اوره ییمده آرزو ائلیرم اولمه میشدن قاباق، گوزو وطن تورپاغینا ایشیقلانسین.
« انسان ایکی حالدا وطن پرست اولار؛ بیر ساواش دا ، بیر ده وطن دن کوچری دوشنده » - دئییر. گویا منیم سیر - صفتیم دن ، عاغلیمدان کئچه نی اوخویا بیلیر.
سوزو دییشمه لییم. قاباقجادان نوت دفتریمده یازدیغیم سوال لاری سوروشمالییام. باش رداکتورون گوزوندن ایراق. ایندی بوردا اولسایدی، دقیقه باشی منه دئمیشدی: « ژورنالیست ! »
اسپیکر باندلارینین اوستونده کی داشدان یونولموش بیر جوت ویولون هیکلینه، هیکل لردن اوتاغین بوجاغینداکی پالتارلارلا قالانمیش آسلامایا باخیرام. نریمانین سرت باخیشی دَییشیلیب. یومشاق، مهربانجا باخیر. باخیشیندا قورشون دئییل، یونگول بیر اسمجه وار، گوزومه توخونور، اوزومه.... نریمان قاشی یلا ، اوست - اوسته قالانمیش پالتارلارا اشاره ائله ییب:
« قیزیم ! من هئش ده مرتّب آدام دئییلم. اوتاغیم همیشه بو جور تور- توکونتودور.»
منه « قیزیم » خطاب ائتدییینده آتام یادیما دوشور. آتامین سیر - صیفتی، هیکلی نریمانا بنزه میردی. ندنسه اونا باخاندا، آتامین یوخلوغونو داها آرتیق حس ائدیرم. آتامی اوزله ییرم. بلکه نریمان دا، هر مصاحبه ده سلیمانین یوخلوق آجیسینی چکیر. اونون تور- توکونتولویونه باش اوزالتماغیمدان اوتانیرام. دئیه سن آتامین اوزل یاشامینا باش اوزالتمیشام. اوتاندیغیمدان پول کیمی پورتوب، قیپ قیرمیزی قیزاریرام. اوسته لیک، اوز الیمدن جینیم توتور. اوزومه گلمه دن، نریمانین اوزونه باخیب، دوداغیمی قاچیردیرام. اوره ییمده اوز- اوزومه: « بویور ! پاییوی آلدین ؟ »- دئییرم.
چانتامدان بیر قیرمیزی جوهر قلم چیخاردیب، اونجه یاز دیغیمی قارالاییرام.



باشیمی قووزایاندا، نریمانین الیمه زیلله ندییینی گورورم. قارالادیغیم یازینین آلتیندا بیر ائو شکیلی رسم ائدیرم. ائله کی نریمان دا اوخویا بیلسین، یازیرام:



نریمان تعجوبله منه باخیر. من سه باخیشیمی یاییندیریب، کتاب رفینه دوغرو دونورم. « ائوی بوش وئر » یازسام دا، هله بی بی سی خجّه نین خاصیت لریندن قورتولا بیلمیرم. یئنه بور - بوجاغی یوخلاماق عاغلیمدان چیخمیر.
کتاب رفی اونجه دن دوشوندویوم کیمی دئییل. اونون اوتاغینا آیاق باسمامیش، رف لرده، اوست - اوسته قالانمیش کتاب لار عاغلیمدایدی. بیر - بیریندن آرالی سلیقه یله دوزو لموش کتاب لار خیالیمداکی تصویری پوزور. ایسته ییرم یئریمدن قالخیب، کتاب لارا بیر گوز گزدیرمیش اولوم. آمما اوز - اوزومه: « دیش دور! یئتیشمه میش قوردون قئینمه سین! »- دئییرم. دوواردا، هئچ اولمازسا، کتاب رفینده کیچیک بیر چرچیوه ایچینده، گوزوم آرازدا بوغولموش سلیمانین شکلینی آختاریر. اونون یئرینه، کتاب رفینین یوخاری قاتیندا، چرچیوه ایچینده، نریما ن ایله بیر جاوان قیز، باشلاریندا کاسکت، بیر- بیرینی قوجاقلامیش، منیم اوزومه گولورلر. قیزین باشینداکی یاشیل کاسکت تر یارپاق لارین رنگینده دیر. چرچیوه ده کی رسمی دفتریمده جیزماقارالاییرام.



نریمان بیر شکیله، بیر ده منه باخیر. گوزلرینده تعجب له گولوش بیر- بیرینه قاریشیب. یئنه دفتریمده یازدیغیم سوال- لارا باخمادان سوروشورام:
- «خانیمیز ائوده؟»
سوالیمدان غافلگیر اولور. گوزلری « سنه نه دخلی وار ! » دئسه ده، سویوق قانلی بیریسی کیمی جواب وئریر:
- «آرواد گئدییب پیاده روییه. »
تبریزه گئدنده، گئدیب سامان میدانینی گورمه لییم. منه دخلی یوخدور؛آمما اونون «آرواد» دئمه ییندن خوشلانمیرام. دوشونجه مه، خانیم لیغیما توخونور. قلمیم قرارسیز بیر حالدا دفتریمین اوستونده اویناماغا باشلاییر.



نریمان سا جیزماقارالادیغیمی سایمادان، باخیشینی منیم قلم - کاغیذیمدان یاییندیریب، چرچیوه دکی قیزی گوستریر:
- « قیزیمدی ! »
بیر شکیله، بیرده نریمانا باخیرام. سویوق قانلی گورونسه ده، چوخ هوشلو- باشلی دیر. نوقطه نی یازمادان، اوخویان لارا بنزه ییر. ایل لردن بری برلین ده یاشاسا دا، هله « امیره قیز » ین «داشقاچی لار» دربندینین دئییمینده دانیشیر: «آرواد!» نه ائش، نه حیات یولداشی، نه ده خانیم!!! منه تئز- تئز « قیزیم » دئین بو جناب، دئمک منی گوز آلتیندا ساخلایاراق، سانجان ایلانا بنزه ییر. اوز- اوزومه دئییرم: «خانیم قیز! مهربان باخیش لارینا آللانما. بو قره او قره لره بنزه مز. گوز- قولاخ اول ... ایلان آدامین توپوغون گودر، آدام ایلانین باشینی...»
کتاب رفیندن بیرآز آرالی، دوواردان بیر جوت ویولون آسیلیب. بیری زیل قارا، او بیری ایسه قهوه ای رنگینده دیر. ویولون لارا باخدیغیمی گورونجه: « اون دانا ویولونوم وار» - دئییر. «هر هارا گئتسم خوشوم گله نی آلارام.»
- « دئمه لی ویولون کلکسیونریسیز ؟ »
- « یوووو... کلکسیونر دئماغ اولماز... پار- پالتاریمنان گو روسوز دا؛ هر هارا گلدی آتارام، آمما هئش زادی ایتیرمه رم. ویولون لاریمین دا هره سی بیر دره ده. »
دقّتله گوزلرینه باخیرام، بلکه فیکریندن کئچن شئی لرین ایزینی گوزلرینده، باخیش لاریندا تاپا بیلم.
دفتریمده یازدیغیم بیرینجی سوالی اونا اوخویورام:
- نه زمان سلیمان لا تانیش اولدوز؟ یولداشلیغیز نئچه ایل دوام ائتدی؟
سوالیمی ائشیتجک قفیلدن سیر- صیفتی دَییشیلیر. میز اوستونده کی اوزو یازدیغی کتابی گوستریر: « اوردا هامیسین یازمیشام.»
سویوق قانلیلیغی هیجان دالغاسینا دونوب.
- « من موسیقی باره سینده اوشاقلیق حس لریمه وفادار قالمیشام . »
دانیشا- دانیشا دال بادال الینی باشینا، توک لرینه چکیر. دئمک استرس ایچینده اَل - آیاق چالیر. اونون هیجانلی گور کمینی گوروب، جیزماقارالاما عادتیمه شوکر ائدیرم. هر نه اولسا، جیزماقارالاما منیم استرسیمی آیدین-آشکار اوزه چکمیر. ایچیمده بیر حس گئت-گئده گوجله نیر. رحم گویوللولوک دئییل. بونا یقینیم وار . حورمت، سایقی جینسیندن دیر بو حس. سوالیمی تکرار ائتمیرم. دانیشیق لارینی دینله دیکجه، انسانین نئچه یونلو اولدوغو عاغلیما چاتیر. بیر انسان سیاستچی اولا بیلر. ایل لرجه دوشونجه سینه گوره دوستاق اولا بیلر. آمما اوشاقلیق دا شکیل تاپمیش شخصیتی دییشیلمز. بیر گون زمان قات لارینین آلتیندان، دوشونجه سیندن، داورانیشیندان باش قالدیرار.
- همیشه سینمالارین قاباغیندا دایانیب ، مرضیه نین ، دیلکشین سسینه قولاق آساندا ، هَپروتا گئدردیم . بوردا دونیا کلاسیک موسیقی لرینی ائشیدندن سورا بیلدیم کی ، من وورولدوغوم موسیقی یله کلاسیک موسیقی آراسیندا ، چوتگه ایله کامپیوتر قدر فرق وار . آمما من گئنه ده چوتگه زمانیندا دایانیب، قالدیم. ایندی ده یاشیمین بو واختیندا، گئنه ده بئلنچی موسیقی لری ائشیدنده، دئییرم به چاراره شهنازدا(۶) ایران سینما سینین قاباغیندا دایانیب، هپروتا گئتمیشم.»
دونوب دووارداکی قهوه ای ویولونو بارماغی ایله گوستریر:
«من تبریزده تربیت آغزیندا بهروزون آتاسی، جعورآنین ویولون کلاسینا گئدردیم. بهروز چوخ بَتر کیشی ایدی. اونون تایی چتین تاپیلار. چوخ یاخجی انسان ایدی. بولوسن داا، بهروز اولنده اونون بیر اوغلو وارییدی. ائله او ایندی منیم ده اوغلومدی...»
بیلمیردیم. اونون صحبت لرینده، باخیشیندا معناسینی اوزومه ترجمه ائده بیلمه دیییم بیر غم - کدر وار. قلمیم اوزومدن اختیارسیز جیزماقارالاییر.



باشیم آشاغیدا، باخیشینین آغیرلیغینی حس ائدیرم؛ بو دونه اوزونو سایمامازلیغا وورا بیلمیر. جیزماقارالادیغیم ویولون شکلینی سوزور. اوشاق کیمی هیجانلانیب. اورک دویونتوسو، سسینی تیتره دیر. اوز دئدییی کیمی هله ده سئودییی موسیقینی ائشیدنده، اوره یی آز قالیر کوکسوندن ائشییه آتیلیب اوندان یاریم مئتیر قاباق تاپ با تاپ، تاپ با تاپ چالسین.
آرخامداکی پنجره دن « تیگلر » دنیزینه باخیر. اونون اوزل دونیاسینا باش اوزالتماغا جان آتیرام. بونونلا بئله اوزومو گوج - بلایلا ساخلاییرام کی، بلکه پنجره یه ساری دونوب، اونون باخیش ردّینی ایزله مه ییم. یقین کی، اونون اوچون بو پنجره چوخ اوزاق لارا آچیلیر...
بو قدر صاف ساده کئچمیش گونلریندن دانیشان انسانین اونونده، سلیمانین اولومونه گوره تنظیمله دیییم سوال لاری نئجه سوروشوم دئیه چاش باش قالیرام. اونون ویولون وورغونو اولدوغونو اونجه دن بیلیردیم؛آنجاق بو سویّه ده دئییل. تمبر، اسکناس، قوروموش کپنک، اوولانمیش حیوان لار، پیپ، کبریت، موشلوک، سیگار، عقیق اوزوک و... نه بیلیم بئله - بئله کلکسیون لاری گورموشدوم، آمما ویولون کلکسیونو هئچ عاغلیما چاتمامیشدی.
بیرینجی سوالیمین جوابینی آلمادان واز کئچیرم. اونسوز دا اوزو دئدییی کیمی، سوروشدوغوم سوالین جوابینی کتابیندا اوخوموشام. دفتریمده کی بیرینجی سوالین اوستونه خط چکیرم.



- سلیمانی، آرازدا بوغولدوقدان سورا گورجک نه حالا قالدیز؟
ایکینجی سوالی نوت دفتریمده اوخویورام. دفتریمه باخدیغینی حس ائدیرم. آمما باشیمی قالدیریب، سوالیمی سوروشماق ایسته دیییمده، اونو هله ده اوزاق لارا دالمیش گورورم. باخیشیندان نیسگیل جالانیر اوتاغین هاواسینا. ندنسه قلمیم کاغیذ اوستونده اوینایاراق، آیری بیر سوال دیلیمه گلیر:



- «عومروزده عاشق اولوبسوز هئچ؟»
قلم-کاغاذیما باخا- باخا دئییر:
- « سنین او بیری خبرنیگارلارینان فرقین وار. نم نییه ایندییه جان هئچ کیمه دئمه دیخ لاریمی سنه دئماغیم گلیر!»
اوز- اوزومه « قورخما خانیم قیز » - دئییرم. «دئیه سن کیر-یخیبسان، سانجان ایلانا بنزه میر. چوخ حمیل دی.»
نریمانا بورا گلمه میش من ده آیری ژورنالیست لر کیمی، بئش- اون کلیشه سوالی دفتریمده دوزمه دوزدویومو دئمیرم. ندنسه اونون اوتاغینا آیاق قویار- قویماز، یانیق قوخوسونو حس ائتدیم. اوسته لیک دئمک قصدیم ده یوخدورکتی، « یانیق » منیم اوچون کاغیذ اوستونده یازیلمیش بیر سوز دئییل. اونونلا دانیشدیغیم دقیقه لر اوتوب کئچدیکجه، یانیق قوخوسونو داها آرتیق حس ائدیرم. کتابیندا یازدیغی سوزلر عاغلیمدان کئچیر: «یانیق حسینی آیری لارینا حس ائتدیرمه مک، نه ده بویوک بیر نعمت ایمیش؛ یوخسا دونیا قابار چالاردی.» نریمانا باخدیقجا، اونون گوزه گورونمز قابار چالمیش یارالارینی دویورام. اونونلا برابر منیم ده دَریم، اتیم، قانیم بئله یانیق قوخویور. باش رداکتور نه دئییر دئسین. قوی یوز دفعه حیرص- غضب له دئسین: « ژورنالیست ! » بو دفعه طرف سیز مصاحبه ائده بیلمیرم. ایسته میرم کلیشه سوال لاریم لا نریمانین یارالارینا دوز سپَم.

نظرات کاربران درباره کتاب دونيا قابار چاليب یولداش